Նորություններ

Հանդիպում ԲՏԱ նախարարի պաշտոնակատար Հայկ Չոբանյանի հետ

01 Հնս 2021

2021թ․ մայիսի 27-ին «Ինտերնետ հանրություն» ՀԿ-ի ներկայացուցչությունը հանդիպում ունեցավ ՀՀ Բարձր տեխնոլոգիական արդյունաբերության նախարարի պաշտոնակատար Հայկ Չոբանյանի հետ։

Հանդիպման ժամանակ քննարկվել են Ինտերնետ և մեդիա ոլորտների, ինչպես նաև կիբերանվտանգության ոլորտի բարելավմանն ու զարգացմանն ուղղված մի շարք միջոցառումների, նախագծերի և ծրագրերի մասին։ Խոսել են նաև ԻՀ ՀԿ-ի կողմից իրականացվող տարբեր ծրագրերի՝ այդ թվում «.հայ» տիրույթի զարգացման ուղիների մասին։

Հանդիպմանը ներկա էին ԻՀ ՀԿ-ի տնօրեն Անդրանիկ Ալեքսանյանը, խորհրդի նախագահ Իգոր Մկրտումյանը, փոխնախագահներ Գրիգորի Սաղյանը և Լիաննա Գալստյանը, ինչպես նաև խորհրդի անդամներ Քրիստինա Հակոբյանն ու Սիրանուշ Վարդանյանը։ Որպես ԲՏԱ նախարարի պաշտոնակատարի խորհրդականներ ներկա էին նաև ԻՀ ՀԿ խորհրդի փոխնախագահներ Ալբերտ Տոնեյանը և Վահան Հովսեփյանը։

Տեսնել ավելին

«.հայ» տիրույթի զարգացման աշխատանքային խմբի հանդիպում

18 Մայ 2021

2021թ․ ապրիլի 21-ին առցանց կայացավ «.հայ» տիրույթի զարգացման աշխատանքային խմբի հանդիպումը: Հաշվի առնելով, որ մայիսի 5-ին լրանում է «․հայ» դոմենային անունների տիրույթի 5-րդ տարեդարձը, աշխատանքային խումբը քննարկումների ընթացքում ձևավորվեց միջոցառումների ծրագիր՝ հետևյալ ուղղություններով․

- Համագործակցելով Թումո ստեղծարար կենտրոնի հետ՝ կազմակերպել ուսանողների շրջանում սոցիալական գովազդի պատրաստման մրցույթ, որտեղ կկարևորվի հայկական բովանդակությունը և նրա կիրառումը հայերի կողմից։ (պատասխանատու՝ Աննա Կարախանյան)

- Համագործակցելով Վիքիմեդիա Հայաստանի հետ՝ կազմակերպել մրցույթ, որի շրջանակում մասնակիցները կպատրաստեն/կխմբագրեն Հայաստանի, հայկական պատմամշակութային ժառանգության մասին նյութեր հայերեն։ (պատասխանատու՝ Լիաննա Գալստյան) 

- Անցկացնել լավագույն «․հայ» կայքերի մրցույթ՝ տարբեր չափորոշիչներով՝ հիմնվելով ոլորտի լավագույն մասնագետներից բաղկացած հանձնաժողովի որոշման վրա։ (պատասխանատու՝ Քրիստինա Հակոբյան) 

Այս ամենի մեկնարկը կտրվի մայիսի 5-ին՝ ներկայացնելով միջոցառումների նպատակը և բոլոր պայմանները մամուլի ասուլիսի ժամանակ, վերջինս կազմակերպել ԲՏԱ նախարարության հետ։ (պատասխանատու՝ Վահան Հովսեփյան)

Բոլոր մրցույթների արդյունքների ամփոփումն ու մրցանակների հանձնումն առաջարկվում է իրականացնել ArmIGF-ի ժամանակ (ենթադրաբար հոկտեմբերին)։

Տեսնել ավելին

Քննարկում՝ ուղղված համացանցում ատելության խոսքի կարգավորմանը

18 Մայ 2021

2021թ. մարտի 30-ին ՀՀ Ազգային Ժողովի մարդու իրավունքների պաշտպանության և հանրային հարցերի մշտական հանձնաժողովի նախաձեռնությամբ տեղի ունեցավ «Ատելության խոսքի կարգավորումը ՀՀ օրենսդրությունում» խորագրով երկրորդ հանդիպումը, որին մասնակցեցին «Ինտերնետ հանրություն» ՀԿ-ի Խորհրդի անդամներ Աննա Կարախանյանը, Գրիգորի Սաղյանը, Լիաննա Գալստյանը, Քրիստինա Հակոբյանը և Քրիստինե Գյոնջյանը:

Հանդիպման ընթացքում տարբեր կազմակերպությունների ներկայացուցիչներն իրենց կարծիքը հայտնեցին հետազոտության առաջարկների մասին՝ նշելով, որ գործող օրենսդրության համաձայն կապի օպերատորները և դոմենային տիրույթի կառավարիչը համացանցում չեն կարգավորում բովանդակությունը:

Հանդիպման ավարտին ՄԱԶԾ փորձագետներին առաջարկվեց հաշվի առնելով քննարկման ընթացքում ոլորտի մասնագետների կողմից ներկայացված պարզաբանումները՝ պատրաստել նոր մոդելային առաջարկներ և ներկայացնել հաջորդ նիստին:

Տեսնել ավելին

«Ինտերնետ հանրություն» ՀԿ խորհրդի նիստ

18 Մայ 2021

2021թ․ մարտ 18-ին տեղի ունեցավ «Ինտերնետ հանրություն» ՀԿ-ի նորընտիր խորհրդի անդամների մասնակցությամբ նիստ, որտեղ խորհրդի նախագահ ընտրվեց Իգոր Մկրտումյանը, իսկ խորհրդի փոխնախագահներ (ըստ այբբենական կարգի)՝ Ալբերտ Տոնեյանը, Գրիգոր Սաղյանը, Լիաննա Գալստյանը և Վահան Հովսեփյանը։

Տեսնել ավելին

Քննարկում «Ատելության խոսքի կարգավորումը համացանցում» թեմայով

18 Մայ 2021

2021թ. մարտի 11-ին ՀՀ Ազգային Ժողովում տեղի ունեցավ ԱԺ մարդու իրավունքների պաշտպանության և հանրային հարցերի մշտական հանձնաժողովի աշխատանքային նիստը՝ «Ատելության խոսքի կարգավորումը ՀՀ օրենսդրությունում» խորագրով, որին մասնակցեցին «Ինտերնետ հանրություն» ՀԿ-ի Խորհրդի անդամներ Գրիգորի Սաղյանը, Լիաննա Գալստյանը, Վահան Հովսեփյանը և Քրիստինա Հակոբյանը:

Հանդիպմանը ներկայացվեց ՄԱԶԾ փորձագետների կողմից կատարված հետազոտության մասին զեկույց, որտեղ ներկայացված են նաև .am/.հայ դոմենային անունների տիրույթներում ատելության խոսքը կարգավորելու մասին սկզբունքներ ու առաջարկներ:

Հանդիպման արդյունքում Հանձնաժողովը հանձն առավ մասնակիցներին տրամադրել այդ հետազոտությունը՝ ծանոթանալու և առաջարկներով հանդես գալու համար:

Տեսնել ավելին

«.հայ» տիրույթի զարգացման աշխատանքային խմբի հանդիպում

18 Մայ 2021

2021թ․ մարտի 10-ին առցանց կայացավ «.հայ» տիրույթի զարգացման աշխատանքային խմբի հանդիպումը, որին մասնակցում էր 11 անդամ: 

Խմբի ղեկավար, «Ինտերնետ հանրություն» ՀԿ-ի փոխնախագահ Լիաննա Գալստյանը ներկայացրեց խմբի աշխատակարգը, աշխատանքային ուղղությունները և վերջին տարիներին կատարված աշխատանքները: Այնուհետ, մտքերի փոխանակում իրականացվեց, որի արդյունքում ձևավորվեց մի քանի ուղղություն.

- լավագույն փորձի ուսումնասիրում,

- կառավարության աջակցության ապահովում,

- համագործակցություն (սփյուռքի հետ աշխատանք, ծրագրավորողների, կայք պատրաստողների, հոսթինգ ծառայության մատակարարների հետ, լեզվի կոմիտեի և այլն),

- հանրայնացում (գովազդային և մարկետինգային արշավներ, տեղեկատվության տարածում, խրախուսական մրցանակներ լավագույն կայքերին)

- հայատառ բովանդակության զարգացմանն աջակցում (Վիկիմեդիա Հայաստանի հետ համատեղ պարբերական նախաձեռնություններ)

- տեխնիկական ոլորտի աշխատանք (ափփ-երի ստեղծում, ստեղնաշար, հայկական կետի (.) խնդրի լուծում, էլ.փոստի աշխատանքի կարգավորում և այլն)

Որոշվեց, որ խմբի առաջիկա հանդիպումները կլինեն ըստ նախանշված ուղղությունների:

Տեսնել ավելին

«Ինտերնետ հանրություն» ՀԿ համաժողով

18 Մայ 2021

«Ինտերնետ հանրություն» ՀԿ-ում 2021թ. մարտի 10-12-ը տեղի ունեցավ համաժողով՝ խորհրդի և վերահսկիչ հանձնաժողովի նոր կազմի ընտրություններով, որի արդյունքում խորհրդի ընտրված անդամներն են (ըստ այբբենական կարգի)՝

Ալբերտ Տոնեյան, Անդրանիկ Ալեքսանյան, Անդրանիկ Մինասյան, Աննա Կարախանյան, Առնակ Մելիքյան, Արամ Վերդյան, Արման Խաչատրյան, Արման Ներսիսյան, Գրիգորի Սաղյան, Իգոր Մկրտումյան, Լիաննա Գալստյան, Կատարինե Գևորգյան, Սիրանուշ Վարդանյան, Վահան Հովսեփյան, Վեսմիրա Հարությունյան, Քրիստինա Հակոբյան, Քրիստինե Գյոնջյան։

«Ինտերնետ հանրություն» ՀԿ վերահսկիչ հանձնաժողովի ընտրված անդամներն են (ըստ այբբենական կարգի)՝

Անի Սահակյան, Արամ Սարգսյան և Արթուր Վարդերեսյան։

Ամփոփիչ համաժողովի ժողովի արձանագրությանը հասանելի է այստեղ։ 

Շնորհավորում ենք բոլոր ընտրված անդամներին և մաղթում ենք բեղմնավոր աշխատանք խորհրդի և վերահսկիչ հանձնաժողովի կազմում:

Տեսնել ավելին

Երկարաձգվեց «Ինտերնետ հանրություն» ՀԿ-ի գործադիր տնօրենի լիազորությունների ժամկետը

14 Մայ 2021

2020 թ․ հունիսի 16-ի «Ինտերնետ հանրություն» ՀԿ-ի խորհրդի որոշմամբ  մեկ տարով երկարաձգվեց «Ինտերնետ հանրություն» ՀԿ-ի գործադիր տնօրեն Անդրանիկ Ալեքսանյանի լիազորությունների ժամկետը։

Տեսնել ավելին

Հաստատվեց կազմակերպության նոր խմբագրությամբ կանոնադրությունը

14 Մայ 2021

2020 թ․ հուլիսի 1-ին կայացավ  «Ինտերնետ հանրություն» ՀԿ-ի Ժողովը, որտեղ հաստատվեց կազմակերպության նոր խմբագրությամբ կանոնադրությունը։ Ընդունված փոփոխություններից են՝ իրավաբանական անձանց անդամակցության հնարավորությունը, ինչպես նաև կազմակերպության նախագահի պաշտոնի վերացումը։

Տեսնել ավելին