Internet Society

Մայիսի 5-ին Ինտերնետ կառավարման հայկական դպրոցում մտավոր սեփականության և ապրանքային նշանների մասին դասախոսությամբ ելույթ ունեցավ Սարգիս Կնյազյանը՝ մտավոր սեփականության իրավունքի բնագավառում մասնագիտացած փաստաբան, արտոնագրային հավատարմատար, «Կնյազյան ընդ Փարթնրս» իրավաբանական գրասենյակը հիմնադիր։ Նա ուսանողներին ներկայացրեց ոլորտի մանրամասները, ինչպես է իրականացվում մտավոր սեփականության պաշտպանությունը և խախտումների դեպքում ինչ կարելի է անել։

Այս տարի առաջին անգամ «Ինտերնետ հանրություն» ՀԿ-ն կազմակերպել էր միջոցառում՝ նվիրված «Աղջիկները ՏՀՏ ոլորտում» (Girls in ICT) միջազգային օրվան։ Միջոցառման նպատակն էր ստեղծել միջավայր, որտեղ խրախուսվում է աղջիկների և կանանց մասնակցությունն ու ձեռքբերումները ՏՀՏ ոլորտում: Միջոցառումը կազմակերպվել էր «կլոր սեղան» ձևաչափով՝ տեղեկատվական տեխնոլոգիաներն իրենց աշխատանքում կիրառող փորձառու և հաջողությունների հասած կանանց և երիտասարդ աղջիկների առերես և հեռահար մասնակցությամբ։ Բազմազան մասնագիտություններ ունեցող մասնակիցները պատմեցին իրենց գործունեության մասին, ինչպես նաև խոսեցին, թե ինչպես են կիրառում ՏՏ-ն՝ իրենց աշխատանքում հաջողությունների հասնելու համար։ Միջոցառման վերջում մասնակիցները բարձր գնահատեցին նման հանդիպման կարևորությունը և ցանկություն հայտնեցին այն դարձնել պարբերական՝ խթանելու ստեղծված համագործակցության մթնոլորտը։

Ապրիլի 21-ին կայացած դասընթացի թեման կիբերանվտանգությունն էր, իսկ հատուկ հյուրը՝ Լեոնիդ Տոդորովը, APTLD գլխավոր տնօրենը։ Նա ներկայացրեց կիբերանվտանգության իրավիճակը Ռուսաստանում և համեմատականներ անցկացրեց Հայաստանի հետ։ Մասնակիցներն ակտիվորեն հետաքրքրվեցին երկու երկրներում առկա զուգահեռներով, ինչպես նաև հարցադրումներ արեցին Ինտերնետ կառավարման էկոհամակարգի մասին:

Ինտերնետ կառավարման հայկական դպրոցում մարդու իրավունքների մասին ելույթով հանդես եկավ Եվրոխորհրդի ներկայացուցիչ Ելենա Դոդոնովան։ Նա մանրամասն ներկայացրեց Եվրոխորհրդի մոտեցումները և ուղեցույցները՝ մարդու իրավունքները առցանց և անցանց միջավայրում։ Մասնակիցները հնարավորություն ունեցան հարց ու պատասխանի միջոցով իրենց մտահոգություններն ու ճշգրտումներն ուղղել դասախոսին։

Ապրիլի 11-ին «Ինտերնետ հանրություն» ՀԿ-ն կազմակերպել էր Եվրոմիության կողմից սահմանված Տվյալների պաշտպանության ընդհանուր կարգավորումների (GDPR) մասին դասախոսություն և հրավիրել էր Ռեգիստրար ընկերությունների ներկայացուցիչներին մասնակցելու այդ հանդիպմանը։ Հիմնական դրույթների ներկայացումից հետո քննարկում ծավալվեց և մասնակիցները մտահոգություններ ներկայացրեցին, թե ինչպիսի հետևանքներ կարող են իրենք կրել GDPR-ի կիրառման արդյունքում։

Ինտերնետ կառավարման հայկական դպրոցում ելույթ ունեցավ Գևորգ Հայրապետյանը՝ ԱՆ Անձնական տվյալների պաշտպանության գործակալությունից, ով ներկայացրեց անձնական տվյալների պաշտպանության առանցքային խնդիրներն ու հարցերը: Նա նշեց, որ ոլորտի հիմնական խնդիրն է պաշտպանել մարդուն՝ իր անձնական կյանքում չարդարացված միջամտությունից, ոտնձգությունից, ներկայացրեց իրական դեպքեր ու փաստեր: Դասախոսությունն ամփոփվեց ոլորտին առնչվող բազմաթիվ հետաքրքիր հարցերով:

Մարտի 31-ին կայացած  դասընթացի թեման կիբերհանցագործություններն էին։ Այդ մասին խոսեց Սամվել Հովսեփյանը՝ ներկայացնելով ոլորտին առնչվող առկա խնդիրները, իրազեկ լինելու առավելություններն ու անհրաժեշտությունը: Լայնածավալ հարցադրումները վկայում էր թեմայի արդիական և հրատապ լինելը:

Դասընթացին ելույթ ունեցավ «Ինտերնետ հանրություն» ՀԿ փոխնախագահ Գրիգորի Սաղյանը, ով ներկայացրեց Եվրոմիության կողմից ընդունված ընդհանուր տվյալների պաշտպանության կանոնակարգը(GDPR): Պարոն Սաղյանը ներկայացրեց Հայաստանի Հանրապետության տեսանկյունից նախատեսվելիք գործընթացները: Այնուհետ  «ABC domain» ընկերության համակարգային ադմինիստրատոր Դավիթ Կարապետյանը հանդես եկավ «PGP/GPG» պրակտիկ դասընթացով:

Ավետիք Եսայանը՝ «Շիրակ Տեխնոլոգիաներ» ընկերության հիմնադիրը, խոսեց իրերի ինտերնետ հասկացության մասին (IoT): Դասախոսության ավարտին ուսանողները բաժանվեցին խմբերի և որպես հանձնարարական կազմեցին և ներկայացրին հասարակությանը անհրաժեշտ IoT նախագծեր` քաղաքի վերելակների և աղբահանության մասին: